பொம்மன் - பெள்ளி தம்பதியை சந்திக்கும் பிரதமர் மோடி

“தி எலிஃபண்ட் விஸ்பரர்ஸ்” என்ற ஆவண படத்தின் யானை பாகன் பொம்மன் – பெள்ளி ஆகியோரை பிரதமர் மோடி சந்திக்க உள்ளார்.

தமிழகத்தில் நடைபெறும் பல்வேறு நிகழ்ச்சியில் கலந்து கொள்வதற்காக வரும் 8 ஆம் தேதி பிரதமர் மோடி தமிழகம் வருகிறார். சென்னை விமான நிலையத்தில் புதியதாக கட்டப்பட்டுள்ள டெர்மினல் கட்டிடத்தை திறந்த வைக்க உள்ளார். இதனைத் தொடர்ந்து சென்னை சென்ட்ரல் ரயில் நிலையத்தில் சென்னை-கோவை இடையே “வந்தே பாரத்” எக்ஸ்பிரஸ் ரயில் சேவையை பிரதமர் மோடி தொடங்கி வைக்கவுள்ளார். இது இந்தியாவின் 11வது வந்தே பாரத் ரயில் சேவையாகும்.

இதை தொடர்ந்து விவேகானந்தர் இல்லத்தில் நடைபெறும் நிகழ்ச்சியில் பங்கேற்க உள்ளார். இந்த நிகழ்ச்சியை முடித்து விட்டு, பல்லாவரத்தில் இருக்கக்கூடிய மைதானத்தில் ரூபாய்.294 கோடி மதிப்பிலான 3 திட்டங்களுக்கு அடிக்கல் நாட்டு விழாவில் கலந்து கொள்கிறார். திருத்துறைப்பூண்டி-அகஸ்தியம்பள்ளி இடையே 37 கி.மீ அகல ரயில் பாதை தாம்பரம்-செங்கோட்டை இடையே வாரத்தில் 3 நாட்கள் விரைவு ரயில் சேவை உள்ளிட்ட திட்டங்களை தொடங்கி வைக்கிறார்.

பிரதமர் மோடி சென்னை பயணத்தை முடித்துக் கொண்டு நீலகிரி மாவட்டம் முதுமலை புலிகள் காப்பகத்தில் உள்ள தெப்பக்காடு வளர்ப்பு யானைகள் முகாமை வருகின்ற 9 ஆம் தேதி பார்வையிடுகிறார். யானைகளை பராமரிக்கும் முறைகள், அவற்றிற்கு வழங்கப்படும் உணவு வகைகள் ஆகிவற்றை குறித்து அதிகாரிகளிடம் கேட்டறிய உள்ளார்.

அதன் பின்னர் அவர் பாகன்களுடன் கலந்துரையாடுகிறார். ஆஸ்கார் விருது பெற்ற “தி எலிஃபண்ட் விஸ்பரர்ஸ்” என்ற ஆவணப்படத்தில் நடித்த பாகன் தம்பதியான பொம்மன் – பெள்ளி ஆகியோரை சந்தித்து அவர்களுக்கு பொன்னாடை போர்த்தி கௌரவிக்கிறார். மேலும் படத்தில் இடம்பெற்றது ரகு பொம்மி குட்டி யானைகளை பார்வையிடுகிறார்.

இதன் பின்னர் முதுமலை வனப்பகுதியில் உள்ள புலிகளின் எண்ணிக்கை மற்றும் புலிகளின் பாதுகாப்பு ஆகிவற்றை பற்றி அங்கு இருக்கும் அதிகாரிகளிடம் கேட்டறிய உள்ளார்.

பிரதமர் வருகையையொட்டி முதுமலையில் பாதுகாப்பு பலப்படுத்தப்பட்டுள்ளது. பிரதமர் மோடி வரும் 9 ஆம் தேதி தெப்பக்காட்டில் உள்ள பொம்மன் – பெள்ளி ஆகியோரை சந்திப்பதற்காக வருகிறார். இந்நிலையில் தம்பதியினருக்கு 24 மணி நேரமும் போலீஸ் பாதுகாப்பு அளிக்கப்பட்டுள்ளது. தம்பதியினரை சந்திப்பதற்காக யார் வந்தாலும் தீவிர பரிசோதனைக்கு பிறகுதான் சந்திப்பதற்கு அனுமதிக்கின்றனர்.