54th International Film Festival Of India : கோவாவில் வரும் நவம்பர் 20-ம் தேதி தொடங்குகிறது

54-வது சர்வதேச இந்திய திரைப்பட விழா (54th International Film Festival Of India)  வரும் நவம்பர் 20-ம் தேதி தொடங்கி 28-ம் தேதி வரை கோவாவில் நடைபெற இருப்பதாக மத்திய அமைச்சர் திரு.அனுராக் தாக்கூர் தெரிவித்துள்ளார். கோவாவில் நடைபெற இருக்கும் இந்த திரைப்பட விழாவில் ஏராளமான இந்திய மற்றும் சர்வதேச அளவிலான திரை நட்சத்திரங்கள் கலந்து கொள்ள உள்ளனர். ஈரான் மற்றும் பிரான்ஸ்  உள்ளிட்ட நாடுகளை சேர்ந்த மிக முக்கியமான படைப்பாளர்கள் இதில் கலந்து கொள்வார்கள். ஊடகம் மற்றும் பொழுதுபோக்கு துறையில் நம் இந்தியா  உலக அளவில் 5-வது மிகப்பெரிய நாடாக திகழ்கிறது. கடந்த 3 ஆண்டுகளில் இந்த சந்தை மதிப்பு 3 சதவீதம் உயர்ந்துள்ளது. கோவா சர்வதேச இந்திய திரைப்பட விழாவில் சத்யஜித்ரே வாழ்நாள் சாதனையாளர் விருதானது ஹாலிவுட்டின் பழம்பெரும் நடிகர் திரு.மைக்கேல் டக்ளஸூக்கு (Michael Douglas) வழங்கப்பட உள்ளது.

இந்த திரைப்பட விழாவின் (54th International Film Festival Of India) சர்வதேச திரைப்படங்களுக்கான பிரிவில் திரையிடப்படும் திரைப்படங்களின் எண்ணிக்கையானது கடந்த ஆண்டை விட 3 மடங்கு இம்முறை அதிகரித்துள்ளது. இது கோவா திரைப்பட விழா மீதான சர்வதேச திரைப்பட துறையின் மதிப்பை வெளிப்படுத்துகிறது. ஐநாக்ஸ் பாஞ்சிம் (4) மக்வினெஸ் பேலஸ் (1) ஐநாக்ஸ் போர்வோரிம் (4) இசட் ஸ்கொயர் சாம்ராட் அசோக் (2) ஆகிய 4 இடங்களில் மட்டுமே 270-க்கும் அதிகமான திரைப்படங்கள் திரையிடப்படுகின்றன. இதில் சர்வதேச பிரிவில் 198 படங்கள் திரையிடப்பட உள்ளன. கடந்த  ஆண்டைக்காட்டிலும் 18 படங்கள் கூடுதலாக இம்முறை திரையிடப்பட உள்ளன, எனவும் அனுராக் தாக்கூர் தெரிவித்துள்ளார்.

இந்திய பனோரமாவில் தேர்வு செய்யப்பட்ட 25 படங்களில்  இயக்குநர் வெற்றிமாறனின் ‘விடுதலை’, ஜெயபிரகாஷ் ராதாகிருஷ்ணன் இயக்கிய ‘காதல் என்பது பொதுவுடைமை’ மற்றும் சம்யுக்தா விஜயன் இயக்கிய ‘நீள நிற சூரியன்’ ஆகிய படங்கள் இடம்பிடித்துள்ளன. அதேபோல் மெயின்ஸ்ட்ரீம் சினிமா பிரிவில் தேர்வாகியுள்ள 5 படங்களில் இயக்குநர் மணிரத்னம் இயக்கிய “பொன்னியின் செல்வன்” இரண்டாம் பாகம் திரையிடப்படவுள்ளது. இயக்குநர் சுதிப்தோ சென் இயக்கத்தில் வெளியாகி நாடு முழுவதும் சர்ச்சையை கிளப்பிய “தி கேரளா ஸ்டோரி” படமும் இடம்பிடித்துள்ளது.