Finder First Look: ஃபைண்டர் படத்தின் ஃபர்ஸ்ட் லுக் போஸ்டர் வெளியீடு

நடிகர் சார்லி முக்கிய கதாபாத்திரத்தில் நடிக்கும் ஃபைண்டர் படத்தின் ஃபர்ஸ்ட் லுக் போஸ்டரை நடிகர் விஜய் சேதுபதி வெளியிட்டுள்ளார்.

பொதுவாக தமிழ் சினிமாவில் யாரும் தொடாத கதைகளை மையமாக வைத்து வெளியாகும் படங்கள் ரசிகர்கள் மத்தியில் நல்ல வரவேற்பை பெறும். படத்தின் இயக்குனர் பிரபலமானவரா அல்லது புதுமுக இயக்குநரா என்பது முக்கியமில்லை. கதைக்களம் சரியாக அமைந்தால் எந்தப் படத்தையும் ரசிகர்கள் ஏற்றுக்கொள்வார்கள் என்பதற்குப் பல உதாரணங்கள் உண்டு. இதுவரை யாரும் தொடாத கதைக்களத்துடன் ஃபைண்டர் படம் தயாராகியுள்ளது.

அரபி புரொடக்ஷன்ஸ் மற்றும் வியன் வென்ஜர்ஸ் ஆகிய நிறுவனங்கள் இணைந்து தயாரிக்கும் இப்படத்தை அறிமுக இயக்குனர் வினோத் ராஜேந்திரன் இயக்கியுள்ளார். ஃபைண்டர் படத்தில், தமிழ் சினிமாவில் 700க்கும் மேற்பட்ட படங்களில் நகைச்சுவை, குணச்சித்திரம் உள்ளிட்ட கேரக்டர்களில் நடித்த நடிகர் சார்லி இப்படத்தில் நடித்துள்ளார். இந்த படத்தின் தொடக்க விழா கடந்த ஆண்டு நவம்பர் 28ம் தேதி நடைபெற்றது. இதன் படப்பிடிப்பு விறுவிறுப்பாக நடந்து வரும் நிலையில் தற்போது இதன் ஃபர்ஸ்ட் லுக் போஸ்டர் வெளியாகியுள்ளது. இந்த ஃபர்ஸ்ட் லுக் போஸ்டரானது தற்போது வைரலாகி வருகிறது.

செய்யாத குற்றங்களுக்காக அமெரிக்க சிறையில் நீண்ட காலம் தண்டனை அனுபவித்து வரும் இந்தியர்கள் மற்றும் அவர்கள் வெளியே வர உதவும் அமைப்பின் கதையை ஃபைண்டர் சொல்கிறது. உண்மை சம்பவத்தை அடிப்படையாக கொண்டு திரில்லர் பாணியில் உருவாகியுள்ள இப்படம் ரசிகர்களை மிகப்பெரிய அளவில் கவரும் என படக்குழுவினர் நம்பிக்கை தெரிவித்துள்ளனர்.