Irfan Pathan Warning : ருதுராஜிடம் இருந்து கேப்டன் பதவி பறிக்கப்படலாம்

நடப்பு ஐபிஎல் தொடரில் இன்னும் சென்னை அணி அடுத்த சுற்றுக்கு முன்னேறவில்லை. ராயல் சேலஞ்சர்ஸ் பெங்களூர் அணிக்கு எதிரான கடைசி லீக் ஆட்டத்தில் சிஎஸ்கே வெற்றி பெற்றால் மட்டுமே பிளே-ஆஃப் சுற்றுக்கு தகுதி பெறும். 2024 ஐபிஎல் தொடரில் சிஎஸ்கே அணி ப்ளே-ஆஃப் சுற்றுக்கு வரவில்லை என்றால், ருதுராஜ் கெய்க்வாட்டின் கேப்டன் பதவி  பறிக்கப்படலாம் என இர்பான் பதான் (Irfan Pathan Warning) எச்சரித்துள்ளார்.

2022 ஐபிஎல் தொடரின் போது சிஎஸ்கே அணியின் கேப்டனாக ஜடேஜா அறிவிக்கப்பட்டார். ஆனால், முதல் எட்டு போட்டிகளின் முடிவில், தொடர் தோல்விகளால் சிஎஸ்கே பிளே ஆஃப் சுற்றுக்கு முன்னேறும் வாய்ப்பை இழந்தது. அதன் பிறகு ஜடேஜாவிடம் இருந்து கேப்டன் பதவி பறிக்கப்பட்டது, தோனி மீண்டும் சிஎஸ்கே கேப்டனானார். இதே போன்ற நிலை மீண்டும் வரலாம். எனவே ராயல் சேலஞ்சர்ஸ் பெங்களூர் அணிக்கு எதிரான போட்டியில் சிஎஸ்கே அணியை ருதுராஜ் வெற்றி பெற செய்ய வேண்டும் என்று பதான் கூறினார். “சிஎஸ்கே அணியில் பலர் காயம் அடைந்துள்ளனர். புதிய கேப்டன் தலைமையில் அணி விளையாடுகிறது. அந்த அணியின் கேப்டன் தோனி இல்லை. அதனால் சிஎஸ்கே அணி இக்கட்டான நிலையில் உள்ளது” என்று பதான் கூறினார்.