Lok Sabha Election Date Announcement: தமிழகத்துக்கு ஏப்ரல் 19-ம் தேதி லோக்சபா தேர்தல் - தேர்தல் ஆணையம் அறிவிப்பு...!

தமிழகத்தில் மொத்தம் 39 நாடாளுமன்ற  (லோக்சபா) தொகுதிகள் உள்ள நிலையில் ஒரே கட்டமாக வரும்  ஏப்ரல் 19-ம் தேர்தல் நடத்தப்பட உள்ளது. ஓட்டு எண்ணிக்கை ஜுன் மாதம் 4-ம் தேதி நடைபெற உள்ளது. இதுதொடர்பான முக்கிய அறிவிப்பை இன்று  இந்திய தேர்தல் ஆணையம் வெளியிட்டுள்ளது. நம் இந்திய நாட்டில் 5 ஆண்டுக்கு ஒரு முறை லோக்சபா தேர்தல் நடந்து வருகிறது. இதற்கு முன்பு கடந்த 2019-ம் ஆண்டு  லோக்சபா தேர்தல் நடைபெற்றது. அப்போது மக்களால் தேர்வு செய்யப்பட்ட எம்பிக்களின் 5 ஆண்டு பதவிக்காலம் வருகின்ற  ஜுன் மாதம் 16-ம் தேதியுடன் முடிவுக்கு வர உள்ளது. இந்நிலையில் மீண்டும் லோக்சபா தேர்தல் நடத்தப்பட உள்ளது.

இந்த லோக்சபா தேர்தலை நடத்துவதற்கான அனைத்து  ஏற்பாடுகளையும்  இந்திய தேர்தல் ஆணையம் தீவிரமாக மேற்கொண்டு வருகிறது. மாநிலங்கள் வாரியாக தலைமை தேர்தல் அதிகாரிகளுடன் தேர்தல் முன்னேற்பாடுகள் குறித்து ஆலோசனை மேற்கொள்ளப்பட்டது. மேலும் தேர்தல் ஆணையத்தில் காலியாக இருந்த 2 தேர்தல் ஆணையர் பொறுப்புக்கு இரண்டு நாட்களுக்கு முன்புதான் புதியவர்கள் நியமனம் செய்யப்பட்டனர். அதன்படி தேர்தல் ஆணையர்களாக திரு. ஞானேஷ் குமார், திரு.எஸ்எஸ் சந்து ஆகியோர் புதிதாக பொறுப்பு ஏற்றனர்.

இந்நிலையில்  லோக்சபா தேர்தல் தேதியானது  16.03.2024 அறிவிக்கப்படும் என இந்திய தேர்தல் ஆணையம் 15.03.2024 அன்று அறிவித்தது. அதன்படி 16.03.2024 அன்று மதியம் 3 மணிக்கு டெல்லியில் உள்ள இந்திய தேர்தல் ஆணைய அலுவலகத்தில் தலைமை தேர்தல் ஆணையர்  திரு. ராஜீவ் குமார் மற்றும் தேர்தல் ஆணையர்கள் ஞானேஷ் குமார், எஸ்எஸ் சந்து ஆகியோர் பத்திரிகையாளர்களை சந்தித்தனர்.  அவர்கள் லோக்சபா தேர்தல் தேதி, வேட்புமனு தாக்கல் தொடங்கும் தேதி, தேர்தல் முடிவு  தேதிகளை அறிவித்துள்ளனர்.