Saripodhaa Sanivaaram Review : சரிபோதா சனிவாரம் திரைப்படத்தின் திரை விமர்சனம்

ஒவ்வொரு சின்ன விஷயத்திற்கும் கோபப்படும் இளைஞனாக சூர்யா (நானி) வளர்கிறார். சூர்யாவின் தாயார் புற்றுநோயால் கொஞ்சம் கொஞ்சமாக இறக்க இருக்கிறார். தான் இறப்பதற்குள் தனது மகன் மற்றும் மகளிடம் அனைத்து முக்கிய விஷயங்களையும் கூறுகிறார். சூர்யாவின் கோபத்தைக் கட்டுப்படுத்த அவனுடைய அம்மா ஒரு வழியைக் கூறுகிறார். ஒவ்வொரு முறையும் கோபம் வரும் போதும் அதை வாரத்தில் ஒரு நாள் மட்டும் காட்ட வேண்டும். எவ்வளவு கோபம் வந்தாலும் வாரம் ஒருமுறை தான் கோபத்தை காட்டுவேன் என்று சூர்யா சத்தியம் செய்கிறார். வாரம் முழுவதும் அமைதி காத்து, தன்னைக் கோபப்படுத்தும் நபர்களின் பெயர்களை டைரியில் எழுதி வைத்து கொள்கிறான். சரியாக சனிக்கிழமை ஆனதும் ஒவ்வொருத்தராக தேடிப் பிடித்து அடித்து நொறுக்குவது என ஹீரோவின் அறிமுகத்துடன் படம் தொடங்குகிறது.

மறுபுறம், இன்ஸ்பெக்டர் தயானந்த் (எஸ்.ஜே.சூர்யா) தனது சகோதரனிடம் இருந்து தனக்கு வரவேண்டிய சொத்து பத்திரத்தில் கையெழுத்து வாங்க போராடுகிறார். தனது அண்ணன் மீது அவருக்கு ஏன் இவ்வளவு வெறுப்பு என்பது எஸ்.ஜே.சூர்யாவின் வழக்கமான ஒரு காட்சியில் சொல்லப்பட்டிருக்கிறது. அரசியல்வாதியான அண்ணன் மீது கோபம் வரும்போதெல்லாம் அப்பாவி மக்களை கொடூரமாக தாக்குகிறார். அதே காவல் நிலையத்தில் புதிதாக வந்த கல்யாணி (பிரியங்கா மோகன்) தான், சிறுவயதில் இருந்தே காதலிக்கும் சூர்யாவின் அத்தையின் மகள். கோபத்தைக் கட்டுப்படுத்த முடியாத இந்த இரண்டு பேரும் நேருக்கு நேர் மோதிக்கொள்வதற்கான சூழல்களை அமைத்து, ஒரு ஆக்‌ஷன் கலந்த குடும்பப் பொழுதுபோக்கு படத்தை இயக்கியிருக்கிறார் இயக்குநர்.