Valli Oyil Kummi Dance Guru : வள்ளி ஒயில் கும்மி நடன கலைஞர் எம்.பத்ரப்பனுக்கு பத்மஸ்ரீ விருது வழங்கப்பட்டது

தமிழகத்தின் தொன்மை வாய்ந்த கலையான ‘வள்ளி ஒயில் கும்மி’ நடனத்தை வெளிப்படுத்திய ‘குரு’ எம்.பத்ரப்பனுக்கு (Valli Oyil Kummi Dance Guru) பத்மஸ்ரீ விருது ஆனது குடியரசு தினத்தன்று அறிவிக்கப்பட்டது. கோவை, மேட்டுப்பாளையம் தாசம்பாளையத்தை சேர்ந்த நடன ஆசிரியர் பத்ரப்பன் கிராமத் திருவிழாக்களில் கடந்த 60 ஆண்டுகளுக்கும் மேலாக வள்ளி கும்மி எனும் கிராமிய நிகழ்ச்சிகளை நடத்தி வருகிறார். அழிந்து வரும் வள்ளி கும்மி நாட்டுப்புற நடனக் கலையை இன்றைய தலைமுறை இளைஞர்களிடம் கொண்டு சேர்க்க வள்ளி கும்மி நாட்டுப்புற நடனக் கலைஞரான பத்ரப்பன் தனது 87 வயதில் பாடுபட்டு வருவதை ஊக்கப்படுத்தியும், ஆண்களுக்கு இணையாக பெண்களுக்கு கற்றுத் தருவதையும், பாராட்டும் வகையில் இந்த பத்மஸ்ரீ விருது ஆனது வழங்கப்பட்டுள்ளது.

பத்ரப்பன் (Valli Oyil Kummi Dance Guru) மேட்டுப்பாளையம் அருகே தாசனூர் என்ற தாசம்பாளையத்தில் 1936 ஏப்ரல் 16 ஆம் நாள் மாரன்ன கவுடர், ரங்கம்மாள் தம்பதியினருக்கு மகனாக பிறந்தார். எட்டாம் வகுப்பு வரை படித்த பத்ரப்பன் பின்னர் கிராமிய கலைமீது கொண்ட ஆர்வத்தால் வள்ளி கும்மியாட்டம் நடத்தத் தொடங்கினார். பத்ரப்பனின் மனைவி மாதம்மாளும் மகன் நக்கீரனும் இறந்துவிட்டனர். பத்ரப்பன் தற்போது மகள் முத்தம்மாள் வீட்டில் வாழ்ந்து வருகிறார்.