Happy Pongal 2024 : பொங்கல் பண்டிகையின் வரலாறு

பொங்கல் பண்டிகை தமிழர்களின் பாரம்பரியம் மற்றும் கலாச்சாரத்தின் அடையாளமாக திகழ்கிறது. இந்த தை திருநாளில் விதைத்த நெற்பயிரை அறுவடை செய்து பயன்பெறுவதோடு, விவசாயத் தொழிலில் தன்னுடன் உழைத்த கால்நடைகளுக்கு நன்றியையும் மகிழ்ச்சியையும் தெரிவித்து ஆண்டுதோறும் கொண்டாடி மகிழ்கின்றனர். போகிப் பொங்கல், சூரியப் பொங்கல், மாட்டுப் பொங்கல் மற்றும் காணும் பொங்கல் என சில இடங்களில் பொங்கல் பண்டிகை நான்கு நாள் திருவிழாவாகக் கொண்டாடப்படுகிறது. பொங்கல் திருநாள் என்று சொன்னவுடனே கரும்பு, ஜல்லிக்கட்டு, பொங்கல், கும்மி என எல்லோருக்கும் தெரியும், ஆனால் இவற்றின் வரலாறு தெரியுமா? இவை ஏன் கொண்டாடப்படுகின்றன என்பதை அறிந்து கொள்வோம்.

Happy Pongal 2024 : தை மாதம் 1ம் தேதி பொங்கல் பண்டிகை கொண்டாடப்படுகிறது. ஆடி மாதத்தில் பயிரிடப்பட்ட நெற்பயிர்களை தை மாதத்தில் அறுவடை செய்யப்பட்டு நல்ல மகசூல் தரும் மாதம் இந்த பொங்கல். இந்த விளைச்சலை நமக்குக் கொடுத்த இயற்கைக்கும் கால்நடைகளுக்கும் நன்றி செலுத்தும் வகையில் சர்க்கரைப் பொங்கலைச் சமைத்து, மாட்டுக்கும் சூரியனுக்கும் நன்றி தெரிவிக்கும் பண்டிகைதான் பொங்கல். பொங்கல் பண்டிகை வருவதற்கு முன்னதாகவே, பொங்கலுக்கு தேவையான பொருட்களை வாங்க துவங்கி விடுகின்றனர். வீட்டைச் சுத்தம் செய்தல், புதிய சுண்ணாம்பு அடித்தல் என ஊரே திருவிழாக் கோலத்தில் காணப்படும். பொங்கல் விழா இந்த திருநாட்டில் நான்கு நாட்கள் கொண்டாடப்படுகிறது.