Vijay Antony & Mirnalini Ravi 's Romeo Trailer : விஜய் ஆண்டனியின் "ரோமியோ" ட்ரெய்லர் வெளியீடு.!

தமிழ் சினிமாவில் இசையமைப்பாளராக இருந்து நடிகராக மாறிய விஜய் ஆண்டனி தற்போது ரோமியோ  திரைப்படத்தில் நடித்து வருகிறார். இயக்குநர் விநாயக் வைத்தியநாதன் இயக்கத்தில் விஜய் ஆண்டனி, மிருணாளினி ரவி ஆகியோர் முதன்மை கதாபாத்திரத்தில் நடித்துள்ளனர். விஜய் ஆண்டனி தயாரித்துள்ள இப்படத்தில் நகைச்சுவை நடிகர் யோகி பாபு, விடிவி கணேஷ், இளவரசு, தலைவாசல் விஜய் உள்ளிட்ட பலர் முக்கிய கதாபாத்திரங்களில் நடித்துள்ளனர். இப்படத்திற்கு பரத் தனசேகர் என்பவர் இசையமைத்துள்ளார்.

இப்படத்தின் ஃபர்ஸ்ட் லுக் போஸ்டர் ஜனவரி 30- ஆம் தேதி வெளியானது. இந்த ஃபர்ஸ்ட் லுக் போஸ்டரில் முதல் இரவு காட்சியில் விஜய் ஆண்டனி கையில் ஒரு சொம்பும் நடிகை மிருணாளினி ரவி கையில் மதுவும் வைத்திருந்த புகைப்படம் இடம்பெற்றிருந்தது. இப்படத்தின் செய்தியாளர் சந்திப்பு சமீபத்தில் சென்னையில் நடைபெற்ற போது நடிகர் விஜய் ஆண்டனி ஃபர்ஸ்ட் லுக் போஸ்டர் குறித்து பதிலளித்த அவர் ரொம்ப நாளாகவே குடி பழக்கம் என்பது நம்ம ஊரில் இருக்கிறது. இதற்கு முன்பு திராட்சை ரசம்  மற்றும் சாராயம் என்ற பெயரில் குடிச்சிட்டு இருந்தோம். ஆனால் தற்போது பார்களில் குடிக்கிறோம்.

சுமார் 2000 ஆண்டுகளுக்கு முன்னாடியே ஜீசஸ் கூட குடிச்சிருக்கார் என கூறியிருந்தார். இதற்கு தமிழ்நாடு கிறிஸ்தவ சபைகளின் கூட்டமைப்பு சங்கங்கள் எதிர்ப்பு தெரிவித்து அவர் பொதுவெளியில்  மன்னிப்பு கேட்க வேண்டுமெனவும் இல்லையெனில் அவர் வீட்டு முன்பு மாபெரும் ஆர்ப்பாட்டம் நடத்தப்படுமெனவும் அறிக்கை வெளியிட்டிருந்தனர்.

இது தொடர்பாக விளக்கமளித்த  நடிகர் விஜய் ஆண்டனி நான் பேசியதை தவறாக  இணைத்து அர்த்தப்படுத்தியதால் உங்களைப் போன்ற சிலர் மனம் புண்பட்டிருக்கிறீர்கள் என்பது எனக்கு வேதனை அளிக்கிறது. நான் தவறாக எதுவும் கூறவில்லை.  நீங்களும் தவறாக புரிந்துகொள்ள வேண்டாம். மக்களுக்காக ரத்தம் சிந்தி உயிர் நீத்த மதங்களுக்கு அப்பாற்பட்ட இயேசுவைப் பற்றி தவறாக சித்தரிக்க எனக்கு கனவிலும் வராது எனத் தெரிவித்தார்.